Այսօր առավոտյան Իրանի հարձակման հիմնական թիրախներն էին Իսրայելի պաշտպանության բանակի հրամանատարության և հետախուզության շտաբը և «Սորոկա» հիվանդանոցին հարակից Իսրայելի պաշտպանության բանակի հետախուզական ճամբարը, հայտնում է իրանական IRNA-ն:
Հաղորդվում է, որ Իսրայելը հարված է հասցրել Արաքի ծանր ջրի հետազոտական ռեակտորի մոտակայքում գտնվող տարածքին, որը Իրանի միջուկային ծրագրի մաս է կազմում։ Իրանի պաշտոնյաները նշում են, որ ճառագայթման վտանգ չկա, քանի որ օբյեկտը տարհանվել էր հարձակումից առաջ:
ԱՄՆ նախագահ Դոնալդ Թրամփը չորեքշաբթի Սպիտակ տան դիմաց լրագրողների հետ զրույցում հրաժարվել է հստակ ասել՝ արդյո՞ք որոշում է կայացրել Իսրայելի օդային գործողություններին միանալու վերաբերյալ։
«Կարող է՝ անեմ, կարող է՝ չանեմ։ Այսինքն՝ ոչ ոք չգիտի՝ ես ինչ եմ պատրաստվում անել», - ասել է նա։
Ավելի ուշ Թրամփը հայտնել է, որ իրանական պաշտոնյաները ցանկացել են Վաշինգտոն գնալ բանակցությունների համար, և հավելել․ «Մենք կարող ենք դա անել, բայց հիմա արդեն մի քիչ ուշ է դրա համար»։
Իրանը հայտնել է, որ երկրի հյուսիս-արևելքում գտնվող Մաշհադ քաղաքում ձերբակալել է 18 «թշնամու գործակալի», որոնք անօդաչու սարքեր են կառուցում իսրայելական հարվածներին աջակցելու համար։ Մանրամասները չեն հաղորդվել։
Իսրայելի վարչապետ Բենիամին Նեթանյահուն տեսաուղերձում հայտարարել է, որ Իսրայելը «քայլ առ քայլ առաջ է գնում»՝ ոչնչացնելու Իրանի միջուկային և բալիստիկ հրթիռային կայաններից բխող սպառնալիքները։